ആലപ്പുഴ: നൂറനാട് എസ്ബിഐ ബാങ്ക് ശാഖയിൽ ബോംബ് വച്ചിട്ടുണ്ടെന്ന് വ്യാജ ഭീഷണി സന്ദേശം. വ്യാഴാഴ്ച വൈകുന്നേരം നാലുമണിയോടെ നൂറനാട് പോലീസ് സ്റ്റേഷനിലെ ലാൻഡ്‌ലൈൻ നമ്പറിലേക്ക് ഒരു പുരുഷന്റെ ഫോൺ കോൾ എത്തിയത്. ബാങ്കിൽ ബോംബ് സജ്ജീകരിച്ചിട്ടുണ്ടെന്നായിരുന്നു അജ്ഞാതന്റെ സന്ദേശം.
എസ്ബിഐ ശാഖയിൽ ബോംബ് വെച്ചിട്ടുണ്ടെന്ന് ഒരു പുരുഷനാണ് വിളിച്ചുപറഞ്ഞത്. സന്ദേശം ലഭിച്ചയുടൻതന്നെ പോലീസ് ബാങ്ക് ബ്രാഞ്ചിലെത്തുകയും ശാഖ അടച്ച് പരിശോധന നടത്തുകയും ചെയ്തു. എന്നാൽ, സംശയാസ്പദമായി യാതൊന്നും കണ്ടെത്താനായില്ല. ബോംബ് സ്ക്വാഡും ഡോഗ് സ്ക്വാഡും സ്ഥലത്തെത്തി പരിശോധന നടത്തും. ഭീഷണിക്കു പിന്നിൽ ആരാണെന്ന് കണ്ടെത്തുന്നതിനായി പോലീസ് സൈബർ സെല്ലിന്റെ സഹായം തേടിയിട്ടുണ്ട്