കൊല്ലം–കോട്ടയം മെമു ട്രെയിൻ എറണാകുളത്തേക്ക് നീട്ടാനുള്ള തീരുമാനം താൽക്കാലികമായി മരവിപ്പിച്ച് റെയിൽവേ മന്ത്രാലയം. യാത്രക്കാരുടെ പ്രതിഷേധം ശക്തമായതിനു പിന്നാലെ റെയിൽവേ മന്ത്രിയുമായും ബോർഡ് ചെയർമാനുമായും നടത്തിയ ചർച്ചയിലാണ് തീരുമാനമുണ്ടായതെന്ന് കൊടിക്കുന്നിൽ സുരേഷ് എംപി അറിയിച്ചു.
നിലവിലെ സമയക്രമത്തിൽ കൊല്ലം–കോട്ടയം റൂട്ടിൽ സർവീസ് നടത്തുന്ന മെമു ട്രെയിൻ നിരവധി സ്ഥിരം യാത്രക്കാരുടെ പ്രധാന ആശ്രയമാണ്. സർവീസ് എറണാകുളത്തേക്ക് നീട്ടുന്നത് നിലവിലുള്ള യാത്രക്കാരുടെ യാത്രാസൗകര്യങ്ങളെ ബാധിക്കുമെന്ന ആശങ്കയെ തുടർന്നാണ് പ്രതിഷേധം ഉയർന്നത്.
മെമു സർവീസ് നിലവിലെ രീതിയിൽ തന്നെ തുടരുന്നതിനൊപ്പം അധിക യാത്രാത്തിരക്ക് പരിഹരിക്കാൻ മറ്റൊരു സംവിധാനം ഏർപ്പെടുത്തുന്ന കാര്യം പരിശോധിക്കുമെന്ന് റെയിൽവേ മന്ത്രി ഉറപ്പുനൽകിയതായി കൊടിക്കുന്നിൽ സുരേഷ് പറഞ്ഞു.
വേണാട് എക്‌സ്പ്രസിലെ തിരക്ക് കുറയ്ക്കാൻ പുതിയ ട്രെയിൻ അനുവദിക്കണമെന്ന ആവശ്യമാണ് യാത്രക്കാർ പ്രധാനമായും ഉന്നയിച്ചിരുന്നത്. എന്നാൽ പുതിയ സർവീസ് ആരംഭിക്കുന്നതിനു പകരം കൊല്ലം–കോട്ടയം മെമു എറണാകുളത്തേക്ക് നീട്ടാനായിരുന്നു റെയിൽവേയുടെ തീരുമാനം. ഇതിനെതിരെ പ്രതിഷേധം ശക്തമായതോടെ എംപി വിഷയത്തിൽ ഇടപെടുകയായിരുന്നു.
വൈകുന്നേരങ്ങളിൽ കോട്ടയത്തുനിന്ന് കൊല്ലത്തേക്കും ഇടയിലുള്ള സ്റ്റേഷനുകളിലേക്കും യാത്ര ചെയ്യുന്നവർക്ക് നിലവിലെ മെമു സർവീസ് ഏറെ പ്രയോജനകരമാണ്. സർവീസ് നീട്ടിയാൽ ഇവരുടെ യാത്രാസമയത്തിലും സൗകര്യങ്ങളിലും മാറ്റമുണ്ടാകുമെന്ന ആശങ്കയും ഉയർന്നിരുന്നു.
എറണാകുളത്തുനിന്ന് കോട്ടയം വഴി കൊല്ലത്തേക്ക് വേണാട് എക്‌സ്പ്രസിന് തൊട്ടുമുമ്പായി പുതിയ ട്രെയിൻ അനുവദിക്കണമെന്നാണ് കൊടിക്കുന്നിൽ സുരേഷ് മുന്നോട്ടുവച്ച നിർദേശം. മെമു സർവീസിനെ ആശ്രയിക്കുന്ന യാത്രക്കാരെ ബുദ്ധിമുട്ടിക്കാതെ അധിക തിരക്ക് പരിഹരിക്കണമെന്ന ആവശ്യവും അദ്ദേഹം റെയിൽവേ മന്ത്രിയുടെ ശ്രദ്ധയിൽപ്പെടുത്തി.