തിരുവനന്തപുരം: പുതുവത്സര ദിനത്തില് സംസ്ഥാനത്തെ സാധാരണക്കാര്ക്കുവേണ്ടി പത്ത് പ്രഖ്യാപനങ്ങള് നടത്തുകയാണെന്ന് മുഖ്യമന്ത്രി പിണറായി വിജയന്. സമയബന്ധിതമായി അവ നടപ്പാക്കുമെന്ന് അദ്ദേഹം വാര്ത്താ സമ്മേളനത്തില് പറഞ്ഞു.
വയോജനങ്ങള്ക്ക് സര്ക്കാര് ഓഫീസുകളില് എത്താതെതന്നെ സേവനങ്ങള് ലഭ്യമാക്കും
മക്കളോ ബന്ധുക്കളോ അടുത്തില്ലാത്ത വയോജനങ്ങള്ക്ക് സര്ക്കാര് ഓഫീസുകളില് നേരിട്ട് എത്താതെതന്നെ സേവനങ്ങള് ലഭ്യമാക്കാനുള്ള സംവിധാനം ഏര്പ്പെടുത്തും. ജനുവരി പത്തിന് മുമ്പ് വിജ്ഞാപനം ചെയ്യുന്ന അഞ്ച് സേവനങ്ങളാവും ആദ്യ ഘട്ടത്തില് ലഭ്യമാക്കുക. മസ്റ്ററിങ്, ലൈഫ് സര്ട്ടിഫിക്കറ്റ്, സാമൂഹ്യ സുരക്ഷാ പെന്ഷന് അപേക്ഷ, സിഎംഡിആര്എഫില് നിന്നുള്ള സഹായം, അത്യാവശ്യ ജീവന്രക്ഷാ മരുന്നുകള് ലഭ്യമാക്കല് എന്നിവയാവും ആദ്യഘട്ടത്തില് ലഭ്യമാക്കുന്ന സേവനങ്ങള്. ക്രമേണ അവര്ക്കുവേണ്ട എല്ലാ സേവനങ്ങളും വീട്ടില്തന്നെ ലഭ്യമാക്കാനുള്ള നടപടി സ്വീകരിക്കും. ഓണ്ലൈനായി അവയ്ക്ക് അപേക്ഷ സമര്പ്പിക്കാന് ബുദ്ധിമുട്ടുള്ളവരുടെ വീടുകളില് പോയി അവരില്നിന്ന് അപേക്ഷ സ്വീകരിക്കും. തുടര് നടപടി സ്വീകരിച്ചശേഷം അക്കാര്യം അധികാരികള് അവരെ വിളിച്ചറിയിക്കും. ഇതിനായി സാമൂഹ്യ സന്നദ്ധ സേനാംഗങ്ങളുടെ സേവനം തദ്ദേശ സ്ഥാപനങ്ങള് വഴി വിനിയോഗിക്കും. 65 വയസില് പ്രായമുള്ളവരും മറ്റുള്ളവരുടെ സഹായമില്ലാതെ താമസിക്കുന്നവരുമായ ഭിന്നശേഷിക്കാര്, കാഴ്ച, കേള്വി, ചലനശേഷി എന്നിവ ഇല്ലാത്തവര് എന്നിവര് താമസിക്കുന്ന വീടുകളുടെ വിവരങ്ങള് തദ്ദേശ സ്ഥാപനങ്ങള് ആ പ്രദേശത്തെ സന്നദ്ധ സേനാംഗങ്ങളെ അറിയിക്കണം. ഭവന സന്ദര്ശനം നടത്തി സര്ക്കാര് സേവനങ്ങള് ആവശ്യമുണ്ടോ എന്ന് അന്വേഷിക്കുകയും സേവനങ്ങള് ലഭ്യമാക്കാനുള്ള നടപടി സ്വീകരിക്കുകയും ചെയ്യും. ജനുവരി 15 ന് ആരംഭിക്കുന്ന പരിപാടിയുടെ ഏകോപന ചുമതല തദ്ദേശ സ്ഥാപന മേധാവികള്ക്കും ജില്ലാ കളക്ടര്മാര്ക്കും ആയിരിക്കും.
ഉന്നത വിദ്യാഭ്യാസ രംഗത്തെ പോരായ്മകള് പരിഹരിക്കാന് എമിന്സ് സ്കോളേഴ്സ് പദ്ധതി
പൊതുവിദ്യാഭ്യാസ മേഖലയുടെ കരുത്തിലും ഗുണമേന്മയിലും രാജ്യത്ത് മെച്ചപ്പെട്ട പുരോഗതി കൈവരിച്ച സംസ്ഥാനമാണ് കേരളം. എന്നാല്, ഉന്നതവിദ്യാഭ്യാസ രംഗത്ത് ഏറെ മുന്നോട്ടുപോകാനുണ്ട്. പഠന താല്പ്പര്യമുള്ള, എന്നാല് സാമ്പത്തികശേഷി കുറവുള്ള വിദ്യാര്ത്ഥികള്ക്ക് ലോകോത്തര നിലവാരമുള്ള അന്താരാഷ്ട്ര സര്വകലാശാലകളില് പോയി പഠിക്കുന്നതിന് പലപ്പോഴും കഴിയാതെ വരുന്നു.
ഈ പോരായ്മ പരിഹരിക്കുന്നതിനുള്ള ശ്രമം എന്ന നിലയില് സര്ക്കാര്എമിനെന്റ് സ്കോളേഴ്സ് ഓണ്ലൈന് എന്ന പരിപാടി ആരംഭിക്കും. ലോകപ്രശസ്ത സാമ്പത്തിക ശാസ്ത്രജ്ഞര്, സാമൂഹ്യശാസ്ത്രജ്ഞര്, ഭാഷാ വിദഗ്ദ്ധര് എന്നിങ്ങനെ വിവിധ മേഖലകളിലുള്ള പ്രമുഖരുമായി നമ്മുടെ കോളേജ്-സര്വകലാശാലകളിലെ ബിരുദ-ബിരുദാനന്തര വിദ്യാര്ത്ഥികള്ക്ക് ആശയവിനിമയം നടത്താന് സംവിധാനമൊരുക്കും. ഒരേസമയം എല്ലാ ജില്ലകളിലെയും പ്രത്യേക കേന്ദ്രങ്ങളില് (സര്ക്കാര് കോളേജിലെ ക്ലാസ് മുറികളില്/ ഓഡിറ്റോറിയങ്ങളില്) ഇവരുടെ പ്രഭാഷണങ്ങള് ഓണ്ലൈനായി കേള്പ്പിക്കാനും അവരോട് സംവദിക്കാനുമുള്ള അവസരമുണ്ടാക്കും. വിക്ടേഴ്സ് പോലുള്ള ചാനലുകള് വഴിയും ഈ സൗകര്യം ഒരുക്കും. ഉന്നതവിദ്യാഭ്യാസ വകുപ്പിന്റെ മേല്നോട്ടത്തിലായിരിക്കും ഈ പരിപാടി. ആദ്യ പ്രഭാഷണം ജനുവരിയില് നടത്തും.
ആയിരം വിദ്യാര്ഥികള്ക്ക് ഒരുലക്ഷം രൂപവീതം സ്കോളര്ഷിപ്പ്
സാമ്പത്തികമായി പിന്നോക്കം നില്ക്കുന്ന (വാര്ഷികവരുമാനം 2.5 ലക്ഷം രൂപയില് താഴെയുള്ള) കുടുംബങ്ങളില് നിന്നുള്ള ബിരുദപഠനം സ്തുത്യര്ഹമായ രീതിയില് പൂര്ത്തിയാക്കുന്ന സംസ്ഥാനത്തെ ആയിരം വിദ്യാര്ത്ഥികള്ക്ക് ഒരുലക്ഷം രൂപ വീതം മുഖ്യമന്ത്രിയുടെ വിദ്യാര്ത്ഥി പ്രതിഭാ ധനഹായ പദ്ധതിപ്രകാരം നല്കും. ഈ തുക ബാങ്ക് അക്കൗണ്ടില് നിക്ഷേപിക്കും. ഈ വിഭാഗത്തിനുള്ളില് മാര്ക്ക്/ഗ്രേഡ് അടിസ്ഥാനത്തിലായിരിക്കും ആദ്യത്തെ ആയിരം പേരെ നിശ്ചയിക്കുക.
അഴിമതിമുക്ത കേരളം പരിപാടി
സാക്ഷരതയും അവബോധവുമുള്ള ജനതയാണ് കേരളത്തിനുള്ളത്. സ്വാഭാവികമായും സര്ക്കാര് സര്വീസിലും പൊതുരംഗത്തുമുള്ള അഴിമതി സമൂഹത്തിലെ പുഴുക്കുത്താണ്. അഴിമതി തടയാനുള്ള വഴികള് പല രീതിയിലും പല ഘട്ടങ്ങളിലും പരീക്ഷിച്ചിട്ടുണ്ട്. വെറുതെ ഉന്നയിക്കുന്ന ആരോപണങ്ങള് അഴിമതി തടയുന്നതിന് സഹായകരമല്ല. അഴിമതിയെപ്പറ്റി കൃത്യമായ വിവരമുള്ളവര്ക്ക് ഇത് പരാതിപ്പെടുമ്പോള് ഉണ്ടാകുന്ന ബുദ്ധിമുട്ടുകളെപ്പറ്റി സ്വാഭാവികമായും ആശങ്കയുണ്ട്. ഇതിനു പരിഹാരമായി 'അഴിമതിമുക്ത കേരളം' പരിപാടി നടപ്പാക്കും.
അഴിമതിയെക്കുറിച്ച് വിവരം ലഭ്യമാക്കുന്ന ആളിന്റെ പേര് രഹസ്യമായി സൂക്ഷിക്കും. ആ ഉറപ്പോടെ സോഫ്റ്റ്വെയറിലൂടെ പരാതി ഉന്നയിക്കാം. സര്ക്കാര് വിജ്ഞാപനം ചെയ്യുന്ന ഒരു അതോറിറ്റിക്കു മുമ്പിലാണ് കൃത്യതയുള്ള പരാതികള് ഉന്നയിക