കോട്ടയം : കെ.എസ്.ആര്‍.ടി.സി ബസില്‍ ഒരുക്കുന്ന കേരളത്തിലെ ആദ്യ എ.സി റെസ്റ്റോറൻ്റ് വൈക്കം കായലോരത്ത് ഒരുങ്ങുന്നു. കായലോര ബീച്ചിലാണ് ഉപയോഗശൂന്യമായ വാഹനം റെസ്റ്റോറൻ്റായി ഒരുങ്ങുന്നത്. സി.കെ. ആശ എം.എല്‍.എയുടെ ആസ്തി വികസന ഫണ്ടില്‍നിന്ന് 50 ലക്ഷം രൂപ ഇതിന് നീക്കിവച്ചിരുന്നു.
പഴയ കെ.എസ്.ആര്‍.ടി ബസില്‍ ഇരുനിലയിലായി 45 ഇരിപ്പിടങ്ങള്‍ ഉണ്ട്. താഴത്തെ നിലയിലെ എ.സി റെസ്റ്റോറൻ്റില്‍ 20 ഇരിപ്പിടങ്ങളും മുകളില്‍ നോണ്‍ എ.സിയില്‍ 25 ഇരിപ്പിടങ്ങളും. റെസ്റ്റോറൻ്റിന് പുറത്ത് ഒരുക്കുന്ന പൂന്തോട്ടത്തില്‍ 30 പേര്‍ക്ക് ഇരുന്ന് ഭക്ഷണം കഴിക്കാം. കായല്‍സൗന്ദര്യം ആസ്വദിക്കാവുന്ന രീതിയിലാണ് സംവിധാനം ചെയ്തിരിക്കുന്നത്.