അബുദാബി: യുഎഇയില് അഞ്ച് പേര്ക്ക് കൂടി കുരങ്ങുപനി സ്ഥിരീകരിച്ചു. രാജ്യത്തെ എപ്പിഡെമിയോളജിക്കല് നിരീക്ഷണ സംവിധാനത്തിന്റെ ഭാഗമായാണ് കേസുകള് കണ്ടെത്തിയത്. കുരങ്ങുപനി ബാധിച്ച് യുഎഇയിലെ ആശുപത്രികളില് ചികിത്സയിലായിരുന്ന രണ്ടു പേര് സുഖം പ്രാപിച്ചതായി ആരോഗ്യ രോഗപ്രതിരോധ മന്ത്രാലയം അറിയിച്ചു. ആകെ എട്ട് രോഗികളായിരുന്നു യുഎഇയില് കുരങ്ങുപനി ബാധിച്ച് ചികിത്സയില് ഉണ്ടായിരുന്നത്. എല്ലാവരും സുരക്ഷാ, പ്രതിരോധ നടപടികള് പാലിക്കണമെന്ന് ആരോഗ്യ- രോഗപ്രതിരോധ മന്ത്രാലയം നിര്ദേശിച്ചു. യാത്ര ചെയ്യുമ്പോഴോ ഒത്തുചേരലുകളുടെ ഭാഗമാകുമ്പോഴോ സുരക്ഷാ നടപടികള് ഉറപ്പുവരുത്തണം. അന്വേഷണം, സമ്പര്ക്കം പരിശോധിക്കല്, രോഗികളുടെ ആരോഗ്യം നിരീക്ഷിക്കല് എന്നിവ ഉള്പ്പെടെ ആവശ്യമായ എല്ലാ നടപടികളും യുഎഇ ആരോഗ്യ വിഭാഗം സ്വീകരിക്കുന്നുണ്ടെന്ന് മന്ത്രാലയം അറിയിച്ചു. കുരങ്ങുപനി സാധാരണയായി രണ്ടു മുതല് നാലാഴ്ച വരെ നീണ്ടുനില്ക്കുന്ന രോഗലക്ഷണങ്ങളുള്ള രോഗമാണ്. രോഗലക്ഷണ സപ്പോര്ട്ടീവ് കെയര് പരിഗണിക്കാന് ഹെല്ത്ത് കെയര് അധികൃതര് സൗകര്യങ്ങള് നിര്ദേശിച്ചിട്ടുണ്ട്. ഗള്ഫില് ആദ്യമായി യുഎഇയിലാണ് കുരങ്ങുപനി സ്ഥിരീകരിച്ചത്. പശ്ചിമ ആഫ്രിക്കന് രാജ്യത്തു നിന്നെത്തിയ 29കാരിയിലാണ് രോഗം കണ്ടെത്തിയത്. ഇവര് ഏത് രാജ്യക്കാരിയാണെന്ന് അധികൃതര് വ്യക്തമാക്കിയിട്ടില്ല. യുഎഇയില് സന്ദര്ശകയായി എത്തിയതായിരുന്നു യുവതി. യുവതിക്ക് ആവശ്യമായ ചികിത്സ നല്കി വരുന്നുണ്ടെന്ന് ആരോഗ്യ മന്ത്രാലയം അധികൃതര് അറിയിച്ചു. കഴിഞ്ഞ ഏതാനും ദിവസങ്ങളിലായി വിവിധ യൂറോപ്യന് രാജ്യങ്ങളിലും വടക്കന് അമേരിക്കന് രാജ്യങ്ങളിലും കുരങ്ങു പനി കേസുകള് കണ്ടെത്തിയിരുന്നു. ബ്രിട്ടന്, സ്പെയിന്, പോര്ച്ചുഗല്, ഇറ്റലി, യുഎസ്, സ്വീഡന്, കാനഡ എന്നിവിടങ്ങളിലാണ് രോഗം റിപ്പോര്ട്ട് ചെയ്തത്. ഏഷ്യയില് ഇസ്രായേലിലും കഴിഞ്ഞ ദിവസം കുരങ്ങുപനി കേസ് കണ്ടെത്തിയിരുന്നു. ഇതിന്റെ അടിസ്ഥാനത്തില് അതീവ ജാഗ്രതയാണ് യുഎഇ ഉള്പ്പെടെയുള്ള ഗള്ഫ് രാജ്യങ്ങളില് തുടരുന്നത്. നേരത്തെ ആഫ്രിക്കന് രാജ്യങ്ങളില് മാത്രമായി കണ്ടുവരാറുള്ള കുരങ്ങു പനി ലോകത്തിന്റെ മറ്റു രാജ്യങ്ങളിലേക്കും പടര്ന്നത് ആരോഗ്യ മേഖലയില് ആശങ്ക സൃഷ്ടിച്ചിട്ടുണ്ട്.
യുഎഇയില് അഞ്ച് പേര്ക്ക് കൂടി കുരങ്ങുപനി സ്ഥിരീകരിച്ചു
jibin
0
Tags
Top Stories