മൂവാറ്റുപുഴ : ചോദ്യപ്പേപ്പർ സൂക്ഷിച്ച സ്കൂളിൽ മോഷണം. മൂവാറ്റുപുഴ ആനിക്കാട് സെൻറ് സെബാസ്റ്റ്യൻസ് ഹയർസെക്കൻററി സ്കൂളിലാണ് സംഭവം. ഹയർ സെക്കൻററി ചോദ്യപേപ്പർ സൂക്ഷിച്ചിരുന്ന മുറിയിലാണ് മോഷണം നടന്നത്. എന്നാൽ ചോദ്യപ്പേപ്പർ നഷ്ടമായിട്ടില്ലെന്നും പണം മാത്രമാണ് നഷ്ടമായതെന്നും സ്കൂൾ അധികൃതർ വ്യക്തമാക്കി.
ചോദ്യപേപ്പർ സൂക്ഷിച്ചിരുന്ന അലമാര തുറന്നിട്ടില്ലെന്നാണ് സ്കൂൾ അധികൃതർ പറയുന്നത്. ചോദ്യപേപ്പർ ഒന്നും പുറത്തുപോയിട്ടില്ല. ചോദ്യപേപ്പർ സൂക്ഷിച്ച അലമാര സീൽ വെച്ച് പൂട്ടിയിരുന്നു. ഇതിന് യാതൊന്നും സംഭവിച്ചിട്ടില്ലെന്നാണ് അധികൃതർ പറയുന്നത്. ഹയർസെക്കൻററി ജോയിൻറ് ഡയറക്ടർ സ്ഥലത്തെത്തി അലമാറ തുറന്നിട്ടില്ലെന്ന് ഉറപ്പുവരുത്തും. ചോദ്യപേപ്പർ സൂക്ഷിച്ചിരുന്ന അലമാര തുറന്നിട്ടില്ലെന്നാണ് സിസിടിവി ദൃശ്യങ്ങളടക്കം പരിശോധിച്ചതിന് ശേഷം പൊലീസ് പറയുന്നത്.
നിലവിൽ സ്ഥലം പൊലീസ് കാവലിലാണ് ഉള്ളത്. ഇന്നലെ രാത്രി 10 നും 11 നും ഇടയിലാണ് മോഷണം നടന്നത് എന്നാണ് പൊലീസ് അറിയിക്കുന്നത്. സ്കൂളിലെ അധ്യാപകരും ജീവനക്കാരും സ്കൂളിലെത്തി പരിശോധന നടത്തിയപ്പോഴാണ് വാതിൽ കല്ലുകൊണ്ട് തകർത്ത് മോഷ്ടാവ് ഉള്ളിൽ കയറിയെന്ന് വ്യക്തമായത്. തുടർന്ന് പൊലീസിനെ അറിയിക്കുകയായിരുന്നു.