കുവൈറ്റ് സിറ്റി: ശ്വാസകോശ സംബന്ധമായ വൈറസ് വ്യാപിക്കുന്നുവെന്ന ആശങ്കകള്‍ക്കിടെ മെഡിക്കല്‍ സ്റ്റാഫുകള്‍ക്ക് മാസ്‌ക് നിര്‍ബന്ധമാക്കി കുവൈറ്റ്. മെഡിക്കല്‍, പാരാമെഡിക്കല്‍ ജീവനക്കാര്‍ ജോലി സമയങ്ങളില്‍ മാസ്‌ക് ധരിക്കണമെന്ന് നിര്‍ദേശിച്ച് കുവൈറ്റ് ആരോഗ്യ മന്ത്രാലയം സര്‍ക്കുലര്‍ പുറത്തിറക്കി.രാജ്യത്തുടനീളമുള്ള എല്ലാ ആശുപത്രികള്‍ക്കും പ്രത്യേക കേന്ദ്രങ്ങള്‍ക്കും പ്രാഥമികാരോഗ്യ കേന്ദ്രങ്ങള്‍ക്കും നിര്‍ദേശം ബാധകമാണ്. ശ്വാസകോശ സംബന്ധമായ വൈറസുകളുടെ വ്യാപനത്തിനെതിരായ പ്രതിരോധ നടപടിയെന്ന നിലയില്‍ മാസ്‌ക് ധരിക്കുന്നത് ഏറെ പ്രധാനമാണെന്ന് 161-ാം നമ്പര്‍ സര്‍ക്കുലറില്‍ പറയുന്നു.മാസ്‌ക് ധരിക്കുന്നതോടൊപ്പം വെള്ളം, സോപ്പ്, അണുനാശിനികള്‍ എന്നിവ ഉപയോഗിച്ച് പതിവായി കൈകള്‍ കഴുകുകയും ശുചിത്വം പാലിക്കുകയും വേണമെന്നും മന്ത്രാലയം നിര്‍ദേശിക്കുന്നു. കൊവിഡ്-19ന്റെയും ഫ്‌ലൂ വാക്സിനുകളുടെയും ഏറ്റവും പുതിയ പതിപ്പുകള്‍ ഉള്‍പ്പെടെ കാലാനുസൃതമായ ശ്വാസകോശ വാക്സിനേഷനുകള്‍ മെഡിക്കല്‍ ഉദ്യോഗസ്ഥര്‍ സ്വീകരിക്കേണ്ടതുണ്ടെന്നും അഭ്യര്‍ത്ഥിക്കുന്നു.ആരോഗ്യ പ്രവര്‍ത്തകരിലും ആരോഗ്യകേന്ദ്രങ്ങളിലും വൈറസ് പടരാനുള്ള സാധ്യത ലഘൂകരിക്കാനും ജീവനക്കാര്‍ക്കും രോഗികള്‍ക്കും സുരക്ഷിതമായ അന്തരീക്ഷം ഉറപ്പാക്കാനുമാണ് ഈ നടപടികളിലൂടെ ഉദ്ദേശിക്കുന്നത്. പൊതുജനങ്ങളുടെ ആരോഗ്യവും സുരക്ഷയും ഉറപ്പാക്കുന്നതിനും ശ്വാസകോശ സംബന്ധമായ അസുഖങ്ങള്‍ പടരുന്നത് തടയുന്നതിനുമുള്ള ശ്രമങ്ങള്‍ തുടരുകയാണെന്നും കുവൈറ്റ് ആരോഗ്യ മന്ത്രാലയം വ്യക്തമാക്കി.കൊവിഡ് 19ന്റെ പുതിയ വകഭേദം ജെഎന്‍.1 വേരിയന്റ് രാജ്യത്ത് കണ്ടെത്തിയതായി കഴിഞ്ഞ ദിവസം ആരോഗ്യ മന്ത്രാലയം സ്ഥിരീകരിച്ചിരുന്നു. എന്നാല്‍ കടുത്ത നടപടികള്‍ സ്വീകരിക്കുന്നില്ലെന്നും ആശങ്കപ്പെടേണ്ട സാഹചര്യം നിലവിലില്ലെന്നും അറിയിച്ചിരുന്നു.