തൃശൂർ വടക്കഞ്ചേരിയിൽ അൽഫാം മന്തിയും മറ്റു ചിക്കൻ വിഭവങ്ങളും കഴിച്ചവർക്ക് ഭക്ഷ്യവിഷബാധ. മുപ്പത്തോളം പേരെയാണ് ആശുപത്രിയിൽ പ്രവേശിപ്പിച്ചത്. കഴിഞ്ഞ ചൊവ്വാഴ്ചയായിരുന്നു സംഭവം. വടക്കഞ്ചേരി ടൗണിലെ ‘ചങ്ങായീസ് കഫെ’ എന്ന സ്ഥാപനത്തിൽ നിന്ന് ഭക്ഷണം കഴിച്ചവർക്കാണ് ഭക്ഷ്യവിഷബാധയേറ്റത്. ഭക്ഷണം കഴിച്ച് മിനിറ്റുകൾക്കുളിൽ തന്നെ ആളുകൾക്ക് ചർദ്ദിയും വയറ്റിളക്കവും ഉണ്ടായി.
വടക്കഞ്ചേരി പരിസരപ്രദേശങ്ങളിലുള്ള കുട്ടികൾ ഉൾപ്പെടെ മുപ്പത്തോളം പേർ ആണ് ഇപ്പോൾ ചികിത്സ തേടിയിരിക്കുന്നത്. ഇവരിൽ പകുതിയോളം പേരുടെ നില അൽപം ഗുരുതരമായിരുന്നു. ചൊവ്വാഴ്ച ഭക്ഷണം കഴിച്ചവർക്ക് വൈകിട്ടും ബുധനാഴ്ചയോടെയും ആണ് ഛർദി, വായിക്കളക്കം, പനി തുടങ്ങിയ ആരോഗ്യ പ്രശ്നങ്ങൾ കണ്ട് തുടങ്ങിയത്. ഇതേ തുടർന്ന് ആശുപത്രിയിൽ എത്തിയപ്പോഴാണ് മറ്റു പലരും ഇവിടെ നിന്നും ഭക്ഷണം കഴിച്ച് ആശുപത്രിയിൽ ചികിത്സ തേടിയ വിവരം അറിയുന്നത്. ആശുപത്രിയിൽ നിന്നും വിവരം ലഭിച്ചതനുസരിച്ച് ഭക്ഷ്യ സുരക്ഷാ വകുപ്പും ആരോഗ്യവകുപ്പും കടയിൽ പരിശോധന നടത്തി.
കടയിലെ അടുക്കള വൃത്തിഹീനമായ അവസ്ഥയിലായിരുന്നു. പഴകിയ സാധനകളൊന്നും കണ്ടെത്തിയിട്ടില്ല. ചിക്കൻ ശരിക്ക് വേവിക്കാതെ നൽകിയതാകാം ഭക്ഷ്യവിഷബാധ യേൽക്കാൻ കാരണം. സംഭവത്തിൽ വിശദമായ അന്വേഷണം നടക്കുകയാണ്. ഹോട്ടലിന് ഭക്ഷ്യസുരക്ഷ വകുപ്പ് നോട്ടീസ് നൽകിയിട്ടുണ്ട്. ഇനി ഒരറിയിപ്പ് ഉണ്ടാകുന്നതുവരെ തുറക്കരുതെന്നാണ് ഭക്ഷ്യസുരക്ഷ വകുപ്പിൻറെ നിർദേശം.