അമ്പലപ്പുഴ: ഗൾഫിൽ നിന്ന് അവധിക്ക് എത്തി കഞ്ചാവ് ചെടിയും കഞ്ചാവുമായി യുവാവ് പിടിയിൽ.ആലപ്പുഴ ആറാട്ടുവഴി ഫാത്തിമ ഗാർഡനിൽ സിയാദ് ഷിഹാബുദ്ദിനെ (33) യാണ് ജില്ലാ ലഹരി വിരുദ്ധ സ്ക്വാഡും ആലപ്പുഴ നോർത്ത് പൊലീസും ചേർന്ന് പിടികൂടിയത്. ഇയാൾ ഗർഫിൽ നിന്ന് വന്നതിന് ശേഷം കഞ്ചാവ് ഉപയോഗവും വിൽപ്പനയും നടക്കുന്നു എന്ന് ജില്ലാ പൊലീസ് മേധാവിക്ക് കിട്ടിയ രഹസ്യവിവരത്തിൻ്റെ അടിസ്ഥാനത്തിൽ ഇയാളുടെ വീട്ടിലും പരിസരത്തും നടത്തിയ പരിശോധനയിലാണ് വീടിനോട് ചേർന്ന് സ്റ്റെയർ കേസിന് താഴെ 60 സെൻ്റി മീറ്റർ നീളത്തിൽ വളർന്ന് നിൽകുന്ന കഞ്ചാവ് ചെടി കണ്ടെടുത്തത്.
തുടർന്ന് വീട്ടിൽ നടത്തിയ പരിശോധനയിൽ 40 ഗ്രാം കഞ്ചാവും കണ്ടെടുത്തു. ഇയാൾ ഗൾഫിൽ നിന്ന് വന്നതിന് ശേഷം ധാരാളം ചെറുപ്പക്കാർ ഇയാളുടെ വീട്ടിലെ നിത്യ സന്ദർശകരായിരുന്നു. ഇവർ ഇവിടെ നിന്നും കഞ്ചാവ് ഉപയോഗിക്കുന്നുണ്ടെന്ന് മനസിലാക്കി ജില്ലാ ലഹരി വിരുദ്ധ സ്ക്വാഡ് ഇയാളെ നിരീക്ഷിച്ചു വരികയായിരുന്നു. നർക്കോട്ടിക് സെൽ ഡി.വൈ.എസ്.പി ബി. പങ്കജാക്ഷന്റെ നേതൃത്വത്തിൽ ജില്ലാ ലഹരി വിരുദ്ധ സ്ക്വാഡും ആലപ്പുഴ ഡി.വൈ.എസ്.പി ബിജു വി നായരുടെയും നേതൃത്വത്തിൽ ഐ.എസ്.എച്ച്.ഒ എം.കെ രാജേഷ്, എസ്.ഐ മാരായ ദേവിക, നിധിൻ, ജി.എസ്.ഐ അനിൽകുമാർ, എ.എസ്.ഐ രശ്മി, സി.പി.ഒ മഹേഷ് , ബിനോയി, ജയേഷ് എന്നിവരാണ് പ്രതിയെ പിടികൂടിയത്.