പത്തനംതിട്ട: കോഴഞ്ചേരി ജില്ലാ ആശുപത്രിയിൽ ചികിത്സയിലിരിക്കെ രോഗിയുടെ ശരീരത്തിൽ സൂചി കുടുങ്ങിയെന്ന അതീവ ഗുരുതരമായ ആരോപണത്തിൽ ആശുപത്രിക്ക് ക്ലീൻ ചിറ്റ് നൽകി ജില്ലാ മെഡിക്കൽ ഓഫീസറുടെ റിപ്പോർട്ട്. ചികിത്സയ്ക്കിടെ സൂചി കുടുങ്ങിയത് കോഴഞ്ചേരി ജില്ലാ ആശുപത്രിയിൽ വെച്ചാണെന്നതിന് തെളിവില്ലെന്നാണ് റിപ്പോർട്ടിൽ പറയുന്നത്. ഡി.എം.ഒ സമർപ്പിച്ച അന്വേഷണ റിപ്പോർട്ട് ആരോഗ്യമന്ത്രി കെ. മുരളീധരന് കൈമാറിയിട്ടുണ്ട്. ആശുപത്രിയിൽ നടത്തിയ പരിശോധനയിൽ വത്സല എന്ന രോഗിയുടെ ചികിത്സയുമായി ബന്ധപ്പെട്ട രേഖകൾ കണ്ടെത്താൻ കഴിഞ്ഞിട്ടില്ലെന്ന് റിപ്പോർട്ട് വ്യക്തമാക്കുന്നു. ചികിത്സാ പിഴവ് സംഭവിച്ചെന്ന് പറയുന്ന ദിവസങ്ങളിൽ രോഗിയുടെ പേശിയിൽ ഇഞ്ചക്ഷൻ എടുത്തിട്ടില്ലെന്നും, ആ ദിവസങ്ങളിൽ ഇഞ്ചക്ഷൻ നൽകിയത് ഞരമ്പിലൂടെ ആണെന്നുമാണ് ആശുപത്രി രേഖകളെ ഉദ്ധരിച്ചുള്ള കണ്ടെത്തൽ.
ആശുപത്രിക്ക് പരമാവധി പ്രതിരോധം തീർക്കുന്നതാണ് റിപ്പോർട്ടെങ്കിലും, കേസ് കൈകാര്യം ചെയ്യുന്നതിൽ ഡ്യൂട്ടിയിലുണ്ടായിരുന്ന ഡോക്ടർക്ക് ഗുരുതരമായ വീഴ്ച സംഭവിച്ചതായി ഡി.എം.ഒ കണ്ടെത്തിയിട്ടുണ്ട്. സൂചി ശരീരത്തിൽ കുടുങ്ങിയ വിവരമറിഞ്ഞിട്ടും രോഗിയെ തുടർചികിത്സ ഉറപ്പാക്കാതെ വീട്ടിലേക്ക് തിരിച്ചയച്ചു. പകുതി സൂചി ശരീരത്തിനുള്ളിലിരിക്കെയാണ് വത്സലയെ ആശുപത്രിയിൽ നിന്ന് ഡിസ്ചാർജ് ചെയ്തത്. ഇത്രയും വലിയൊരു സംഭവം ഉണ്ടായിട്ടും ഡി.എം.ഒ ഉൾപ്പെടെയുള്ള ഉയർന്ന ഉദ്യോഗസ്ഥർക്ക് കൃത്യസമയത്ത് വിവരം കൈമാറാൻ ആശുപത്രി അധികൃതർ തയ്യാറായില്ലെന്നും ആരോപണമുണ്ട്.അതേസമയം, ശസ്ത്രക്രിയയിലൂടെ പുറത്തെടുത്തത് കുത്തിവെപ്പിന് ഉപയോഗിക്കുന്ന സൂചിയുടെ ഭാഗം തന്നെയാണെന്ന് കോഴഞ്ചേരി ജില്ലാ ആശുപത്രി അധികൃതർ നേരത്തെ സ്ഥിരീകരിച്ചിരുന്നു. എന്നാൽ ഇത് തങ്ങളുടെ ആശുപത്രിയിൽ വെച്ചല്ല സംഭവിച്ചത് എന്ന വാദത്തിലാണ് ഇപ്പോൾ അധികൃതർ ഉറച്ചുനിൽക്കുന്നത്. ആരോഗ്യ മന്ത്രി റിപ്പോർട്ട് തേടിയ സാഹചര്യത്തിൽ വിഷയത്തിൽ വരും ദിവസങ്ങളിൽ കൂടുതൽ കർശനമായ വകുപ്പുതല നടപടികൾ ഉണ്ടായേക്കും.