ഭക്ഷണസാധനങ്ങൾ, ധാന്യച്ചാക്കുകൾ, പാചകപാത്രങ്ങൾ, ചുരുട്ടിവെച്ച കിടക്കകൾ എന്നിവയുമായി ആയിരക്കണക്കിന് കർഷകർ മധ്യപ്രദേശ് തലസ്ഥാനമായ ഭോപ്പാലിൽ പ്രതിഷേധം ശക്തമാക്കി. പോലീസ് ബാരിക്കേഡുകൾ മറികടന്ന് ചൊവ്വാഴ്ച രാത്രിയോടെ നഗരത്തിലേക്ക് പ്രവേശിച്ച രണ്ടായിരത്തിലധികം കർഷകർ ഇപ്പോൾ മുഖ്യമന്ത്രി മോഹൻ യാദവിന്റെ വസതിയിലേക്ക് മാർച്ച് നടത്തുകയാണ്.
വിളകളും വളവും സംഭരിക്കുന്നതിനും വിതരണം ചെയ്യുന്നതിനുമായി നടപ്പാക്കിയിരിക്കുന്ന ‘ഇ-ടോക്കൺ’ സംവിധാനം പിൻവലിക്കണമെന്നും, പയർവർഗ്ഗ വിളകൾ സർക്കാർ പൂർണമായി സംഭരിക്കണമെന്നുമാണ് കർഷകരുടെ പ്രധാന ആവശ്യങ്ങൾ. ഈ ആവശ്യങ്ങൾ അംഗീകരിക്കുന്നതുവരെ സമരത്തിൽ നിന്ന് പിന്മാറില്ലെന്നാണ് പ്രതിഷേധക്കാർ വ്യക്തമാക്കുന്നത്.