വയനാട് തുരങ്കപാതയ്ക്ക് സമീപം ദുരന്തഭൂമി… നിരവധി പേർ മണ്ണിനടിയിൽ…

        

വയനാട്: വയനാട് കള്ളാടി തുരങ്കപാത നിർമ്മാണ മേഖലയിലുണ്ടായ വൻ മണ്ണിടിച്ചിലിൽ നിരവധി ആളുകൾ മണ്ണിനടിയിൽ കുടുങ്ങിക്കിടക്കുന്നതായി വാർഡ് മെമ്പർ ജിതിൻ മേപ്പാടി. കനത്ത മഴയെത്തുടർന്ന് മീനാക്ഷി പാലത്തിന് സമീപം ഉണ്ടായ മണ്ണിടിച്ചിലിൽ ചിലരെ നിലവിൽ രക്ഷപ്പെടുത്തിയിട്ടുണ്ടെങ്കിലും ഇനിയും ഒട്ടനവധി പേർ അപകടത്തിൽപ്പെട്ടിട്ടുണ്ടെന്നാണ് ഒടുവിലത്തെ വിവരങ്ങൾ. പ്രദേശത്തെ പാലം പൂർണ്ണമായും മണ്ണുമൂടിയ നിലയിലാണ്. മണ്ണ് ഇപ്പോഴും തുടർച്ചയായി ഇടിഞ്ഞുകൊണ്ടിരിക്കുകയാണെന്നും ഗതാഗതം പൂർണ്ണമായി തടസ്സപ്പെട്ടിരിക്കുകയാണെന്നും ജിതിൻ മേപ്പാടി വ്യക്തമാക്കി.

മണ്ണിടിഞ്ഞു വീഴുന്ന സമയത്ത് പാലത്തിലും പരിസരത്തുമായി നിരവധി ആളുകൾ ഉണ്ടായിരുന്നു. നിലവിൽ നാട്ടുകാരും പോലീസും ഒരു യൂണിറ്റ് ഫയർഫോഴ്സും സംഭവസ്ഥലത്ത് എത്തി അതീവ ജാഗ്രതയോടെ രക്ഷാപ്രവർത്തനം നടത്തിവരികയാണ്. തുരങ്കപാതയിലെ വൻ മണ്ണിടിച്ചിലിന്റെ പശ്ചാത്തലത്തിൽ ജില്ലയിൽ നിന്നുള്ള മന്ത്രിയായ ടി. സിദ്ദിഖുമായി മുഖ്യമന്ത്രി വി.ഡി. സതീശൻ അടിയന്തര കൂടിക്കാഴ്ച നടത്തി. ദുരന്തമേഖലയിലെ രക്ഷാപ്രവർത്തനങ്ങൾ യുദ്ധകാലാടിസ്ഥാനത്തിൽ ഏകോപിപ്പിക്കാൻ മുഖ്യമന്ത്രി കർശന നിർദ്ദേശം നൽകി. റവന്യൂ മന്ത്രി എ.പി. അനിൽകുമാറിനോടും കൃഷി മന്ത്രി കൂടിയായ ടി. സിദ്ദിഖിനോടും ഉടനടി വയനാട്ടിലെ സംഭവസ്ഥലത്തേക്ക് തിരിക്കാൻ മുഖ്യമന്ത്രി വി.ഡി. സതീശൻ നിർദ്ദേശിച്ചിട്ടുണ്ട്. കൂടാതെ, ദേശീയ ദുരന്തപ്രതികരണ സേനയോട് അടിയന്തരമായി സംഭവസ്ഥലത്തേക്ക് പുറപ്പെടാൻ മന്ത്രി ടി. സിദ്ദിഖ് നിർദ്ദേശം നൽകി കഴിഞ്ഞു.

തുരങ്കപാതയുടെ സുരക്ഷയ്ക്കായി നിർമ്മിച്ചിരുന്ന കൂറ്റൻ കോൺക്രീറ്റ് ഭിത്തി മണ്ണിടിച്ചിലിന്റെ ആഘാതത്തിൽ പൂർണ്ണമായും തകർന്നടിഞ്ഞിട്ടുണ്ട്. കഴിഞ്ഞ ഏതാനും മണിക്കൂറുകളായി ഈ പ്രദേശത്ത് അനുഭവപ്പെടുന്ന അതിശക്തമായ കനത്ത മഴയാണ് വലിയ ദുരന്തത്തിന് കാരണമായത്. പ്രതികൂല കാലാവസ്ഥയും തുടരുന്ന മണ്ണിടിച്ചിലും രക്ഷാപ്രവർത്തനത്തിന് വലിയ വെല്ലുവിളി ഉയർത്തുന്നുണ്ട്. കൂടുതൽ രക്ഷാസേനകൾ ഉടൻ തന്നെ കള്ളാടിയിലേക്ക് എത്തിച്ചേരുമെന്നാണ് ഔദ്യോഗിക വൃത്തങ്ങൾ നൽകുന്ന വിവരം.