ചണ്ഡീഗഢ്: പഞ്ചാബിലെ സംഗ്രൂര്‍ ജില്ലയില്‍ റോഡരികില്‍ ജോലി ചെയ്തുകൊണ്ടിരുന്ന തൊഴിലുറപ്പ് പദ്ധതി തൊഴിലാളികള്‍ക്കുമേല്‍ അമിതവേഗത്തിലെത്തിയ കാര്‍ ഇടിച്ചുകയറി എട്ട് പേര്‍ മരിച്ചു. അപകടത്തില്‍ നിരവധി തൊഴിലാളികള്‍ക്ക് പരിക്കേറ്റിട്ടുണ്ട്.
ലെഹ്രാഗഗ-ജാഖല്‍ റോഡില്‍ തൊഴിലുറപ്പ് ജോലികളില്‍ ഏര്‍പ്പെട്ടിരുന്ന തൊഴിലാളികള്‍ക്ക് നേരെയാണ് പാഞ്ഞെത്തിയ ഷെവര്‍ലെ മാഗ്‌നം കാര്‍ ഇടിച്ചുകയറിയത്. സംഭവത്തെ തുടര്‍ന്ന് പ്രദേശത്ത് വലിയ രീതിയില്‍ പ്രതിഷേധമുണ്ടായതായി പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നു. അപകടസമയത്ത് 23 തൊഴിലാളികള്‍ സ്ഥലത്ത് ജോലി ചെയ്യുന്നുണ്ടായിരുന്നു.
പരിക്കേറ്റവരെ ഉടന്‍തന്നെ അടുത്തുള്ള ആശുപത്രിയില്‍ പ്രവേശിപ്പിച്ചു. എന്നാല്‍ അപകടശേഷവും പൊലീസിന്റെയും ആംബുലന്‍സിന്റെയും ഭാഗത്തുനിന്നും കൃത്യസമയത്ത് സഹായം ലഭിച്ചില്ലെന്നാരോപിച്ച് പ്രദേശവാസികള്‍ രംഗത്തെത്തിയിട്ടുണ്ട്. റായ്ധ്രാന സ്വദേശിയായ പർഗത് സിങ് കല എന്നയാളാണ് കാർ ഓടിച്ചിരുന്നത്. ഇയാളെ പൊലീസ് അന്വേഷിച്ചു വരികയാണ്.