…

        

കൊച്ചി: മൂന്ന് പേരുടെ ജീവനെടുത്ത എറണാകുളം നെടുമ്പാശ്ശേരി മിനി കൂപ്പർ അപകടത്തിൽ അന്വേഷണത്തിനായി പ്രത്യേക സംഘത്തെ നിയോഗിച്ചു. എറണാകുളം റൂറൽ എസ്പിയുടെ മേൽനോട്ടത്തിൽ രൂപീകരിച്ച സംഘത്തിന്റെ അന്വേഷണ ചുമതല ആലുവ ഡിവൈഎസ്പി ബൈജു കെ. പൗലോസിനാണ്. കേസിലെ പ്രതി സുഹൈൽ സജീവിനായി പൊലീസ് സമർപ്പിച്ച കസ്റ്റഡി അപേക്ഷ അങ്കമാലി മജിസ്‌ട്രേറ്റ് കോടതി പരിഗണിച്ചു. തുടർന്ന് രണ്ട് ദിവസത്തെ പൊലീസ് കസ്റ്റഡി അനുവദിച്ചു.

കേസിൽ സമഗ്രമായ അന്വേഷണം വേണമെന്ന് പ്രോസിക്യൂഷൻ കോടതിയിൽ ആവശ്യപ്പെട്ടു. അശ്രദ്ധയും അപകടകരവുമായ ഡ്രൈവിങ്ങാണ് അപകടത്തിന് കാരണമായതെന്ന് പ്രോസിക്യൂഷൻ ചൂണ്ടിക്കാട്ടി. മരിച്ച പെൺകുട്ടികൾക്ക് ഒരുപാട് സ്വപ്നങ്ങളുണ്ടായിരുന്നുവെന്നും പ്രതികൾക്ക് പ്രായക്കുറവിന്റെ പരിഗണന നൽകേണ്ടതില്ലെന്നും പ്രോസിക്യൂഷൻ വാദിച്ചു. പ്രതികൾ അമിതമായി മദ്യപിച്ചിരുന്നുവെന്നും ഉച്ചമുതൽ മദ്യപിച്ച ശേഷം വീണ്ടും മാരിയറ്റ് ഹോട്ടലിൽ മദ്യപിക്കാൻ ഒത്തുകൂടിയെന്നും പ്രോസിക്യൂഷൻ ആരോപിച്ചു. മദ്യപിച്ച് വാഹനം ഓടിച്ചാൽ മനുഷ്യജീവന് അപകടമുണ്ടാകുമെന്ന് പ്രതികൾക്ക് അറിയില്ലേയെന്നും പ്രോസിക്യൂഷൻ ചോദിച്ചു. മരണത്തെ ന്യായീകരിക്കുന്നില്ലെന്ന് വ്യക്തമാക്കിയ പ്രതിഭാഗം, സത്യസന്ധമായ അന്വേഷണം വേണമെന്ന് ആവശ്യപ്പെട്ടു. മാധ്യമങ്ങളെ തൃപ്തിപ്പെടുത്താനല്ല അന്വേഷണം നടത്തേണ്ടതെന്നും പ്രതികളെ മാധ്യമങ്ങൾക്ക് മുന്നിൽ പ്രദർശിപ്പിക്കുകയും അറസ്റ്റ് മാധ്യമങ്ങൾ ആഘോഷിക്കുകയും ചെയ്തുവെന്നും പ്രതിഭാഗം ആരോപിച്ചു

കേസിന്റെ അന്തിമഫലം പൊലീസ് നേരത്തേ തീരുമാനിച്ചിട്ടുണ്ടെന്നും മാധ്യമങ്ങളെ തൃപ്തിപ്പെടുത്താനാണ് ശ്രമിച്ചതെന്നും പ്രതിഭാഗം വാദിച്ചു. അപകടത്തിൽപ്പെട്ട സ്കൂട്ടറിൽ സഞ്ചരിച്ച ആർക്കും ഹെൽമറ്റ് ഉണ്ടായിരുന്നില്ലെന്നും പ്രതിഭാഗം ചൂണ്ടിക്കാട്ടി. അതേസമയം, മിനി കൂപ്പർ ഓടിച്ച സുഹൈൽ സജീവിന് പരമാവധി ശിക്ഷ ഉറപ്പാക്കുമെന്ന് ആഭ്യന്തര മന്ത്രി രമേശ് ചെന്നിത്തല നിയമസഭയിൽ പറഞ്ഞു. അന്വേഷണത്തിലോ എഫ്‌ഐആർ രജിസ്റ്റർ ചെയ്തതിലോ പൊലീസിന്റെ ഭാഗത്തുനിന്ന് ബോധപൂർവമായ വീഴ്ചയുണ്ടായിട്ടില്ലെന്നും പ്രതിപക്ഷത്തിന്റെ വിമർശനങ്ങൾക്ക് മറുപടിയായി അദ്ദേഹം വ്യക്തമാക്കി. പ്രതിയുടെ പേര് എഫ്‌ഐആറിൽ ചേർക്കാൻ വൈകിയതും മദ്യപിച്ചിരുന്നുവെന്ന കാര്യം രേഖപ്പെടുത്താതിരുന്നതും സംശയകരമാണെന്ന് പ്രതിപക്ഷ നേതാവ് ആരോപിച്ചു. മരിച്ച പെൺകുട്ടികൾക്കെതിരായ വർഗീയ പരാമർശങ്ങളെ സഭ ഒന്നടങ്കം അപലപിക്കുന്നുവെന്ന് സ്പീക്കർ തിരുവഞ്ചൂർ രാധാകൃഷ്ണനും പറഞ്ഞു.