തിരുവനന്തപുരം: മൂന്നുപേരുടെ ജീവനെടുത്ത നെടുമ്പാശ്ശേരി മിനി കൂപ്പർ വാഹനാപകടക്കേസ് അട്ടിമറിക്കാൻ ശ്രമമെന്ന ആരോപണം പരിശോധിക്കുമെന്ന് സംസ്ഥാന പൊലീസ് മേധാവി റവാഡ ചന്ദ്രശേഖർ. പ്രതിയെ സംരക്ഷിക്കേണ്ട ആവശ്യം പൊലീസിനില്ലെന്നും ആരോപണം തെറ്റാണെന്നും ഡിജിപി വ്യക്തമാക്കി. ശക്തമായ നടപടികളുമായാണ് പൊലീസ് മുന്നോട്ടുപോകുന്നതെന്നും പ്രതിക്കെതിരെ ശക്തമായ വകുപ്പുകൾ ചുമത്തിയിട്ടുണ്ടെന്നും അദ്ദേഹം പറഞ്ഞു.
കേസ് അട്ടിമറിക്കാൻ ശ്രമം നടക്കുന്നുവെന്ന് മരിച്ച വയനാട് സ്വദേശി ദേവികയുടെ കുടുംബവും നേരത്തേ ആരോപിച്ചിരുന്നു. പ്രതിയുടെ സാമ്പത്തികശേഷി കേസിനെ സ്വാധീനിക്കുമോയെന്ന ആശങ്ക മരിച്ച കർണാടക സുള്ള്യ സ്വദേശി ഇയാസിന്റെ കുടുംബവും പങ്കുവച്ചിട്ടുണ്ട്. കുടുംബങ്ങളുടെ ആശങ്കകൾ പരിഗണിക്കുമെന്ന് ആഭ്യന്തരമന്ത്രി രമേശ് ചെന്നിത്തല ഉറപ്പുനൽകിയിരുന്നു. പ്രതിയെ രക്ഷിക്കാൻ പൊലീസ് നീക്കം നടത്തിയെന്ന ആരോപണവുമായി സിപിഐഎമ്മും ഡിവൈഎഫ്ഐയും രംഗത്തെത്തിയിരുന്നു. അതേസമയം, പ്രതി സുഹൈൽ സജീവും സുഹൃത്തുക്കളും മദ്യപിച്ചിരുന്നതായി പൊലീസ് റിമാൻഡ് റിപ്പോർട്ടിൽ പറയുന്നു. കുറ്റകരമായ നരഹത്യ, പൊതുവഴിയിൽ അശ്രദ്ധമായി വാഹനമോടിക്കൽ തുടങ്ങിയ കുറ്റങ്ങളാണ് സുഹൈലിനെതിരെ ചുമത്തിയിരിക്കുന്നത്. മദ്യം വാങ്ങാനുള്ള നിയമപരമായ പ്രായം 23 ആയിരിക്കെ, 19 വയസ്സുകാരനായ പ്രതി ബാറുകളിൽ കയറി മദ്യപിച്ചെന്ന സംഭവത്തിലും എക്സൈസ് കേസെടുത്തു.