കൊച്ചി: നെടുമ്പാശ്ശേരിയിൽ മൂന്ന് പേരുടെ മരണത്തിനിടയാക്കിയ മിനി കൂപ്പർ അപകടക്കേസിൽ മുഖ്യപ്രതി സുഹൈലുമായി തെളിവെടുപ്പ് നടത്തി പൊലീസ്. അപകടം നടന്ന എയർപോർട്ട് റോഡിലും അപകടത്തിന് മുമ്പ് മദ്യപിച്ച ബാറിലുമാണ് പ്രതിയെ എത്തിച്ചത്. ഇന്ന് വൈകിട്ട് അഞ്ചുമണി വരെയാണ് പ്രതികളെ പൊലീസ് കസ്റ്റഡിയിൽ വിട്ടിരിക്കുന്നത്. ഈ സമയത്തിനുള്ളിൽ പരമാവധി തെളിവുകൾ ശേഖരിക്കാനാണ് അന്വേഷണസംഘത്തിന്റെ നീക്കം.
കേസിലെ മുഖ്യപ്രതിയായ സുഹൈലിനെ മാത്രമാണ് തെളിവെടുപ്പിനായി പുറത്തേക്ക് കൊണ്ടുപോയത്. ആദ്യം അപകടം നടന്ന എയർപോർട്ട് റോഡിലെത്തിച്ചു. എന്നാൽ ജനക്കൂട്ടം കൂടാൻ സാധ്യതയുള്ളതിനാൽ പ്രതിയെ വാഹനത്തിൽനിന്ന് പുറത്തിറക്കിയില്ല. അപകടം നടന്ന സ്ഥലവും പിന്നീട് വാഹനം നിർത്തിയ സ്ഥലവും സുഹൈൽ അന്വേഷണസംഘത്തിന് ചൂണ്ടിക്കാണിച്ചുകൊടുത്തു. സ്ഥലത്ത് ആളുകൾ കൂടിയതോടെ ക്രമസമാധാന പ്രശ്നമുണ്ടാകാൻ സാധ്യതയുണ്ടെന്ന് കണക്കാക്കിയാണ് പ്രതിയെ വാഹനത്തിൽനിന്ന് പുറത്തിറക്കാതിരുന്നത്. അപകടസ്ഥലത്തെ തെളിവെടുപ്പ് വേഗത്തിൽ പൂർത്തിയാക്കിയ ശേഷം സുഹൈലിനെ നെടുമ്പാശ്ശേരിയിലെ ബാറിലെത്തിച്ചു. അപകടത്തിന് മുമ്പ് പ്രതികൾ അവസാനമായി മദ്യപിച്ചത് ഈ ബാറിൽവെച്ചായിരുന്നുവെന്നാണ് പൊലീസിന്റെ കണ്ടെത്തൽ.
ബാറിൽ ഏറെനേരം തെളിവെടുപ്പ് തുടർന്നു. മറ്റ് ബാറുകളിലും തെളിവെടുപ്പ് നടത്താനാണ് അന്വേഷണസംഘത്തിന്റെ തീരുമാനം. പ്രായപരിധി തികയാത്ത സുഹൈലിനും സുഹൃത്തുക്കൾക്കും മദ്യം നൽകിയെന്ന കണ്ടെത്തലിനെ തുടർന്ന് ബന്ധപ്പെട്ട ബാറുകളുടെ ലൈസൻസ് സസ്പെൻഡ് ചെയ്തിട്ടുണ്ട്. ഇന്ന് വൈകിട്ട് അഞ്ചുമണി വരെയാണ് പ്രതികളെ ചോദ്യം ചെയ്യുന്നതിനും തെളിവെടുപ്പിനുമായി പൊലീസ് കസ്റ്റഡിയിൽ വിട്ടിരിക്കുന്നത്. ഈ സമയത്തിനുള്ളിൽ അപകടവുമായി ബന്ധപ്പെട്ട കൂടുതൽ വിവരങ്ങളും തെളിവുകളും ശേഖരിക്കാനാണ് ഉദ്യോഗസ്ഥരുടെ ശ്രമം. അപകടത്തിലേക്ക് നയിച്ച സാഹചര്യങ്ങൾ, പ്രതികൾ മദ്യപിച്ച കേന്ദ്രങ്ങൾ, സംഭവവുമായി ബന്ധപ്പെട്ട മറ്റ് തെളിവുകൾ എന്നിവ കേന്ദ്രീകരിച്ചാണ് അന്വേഷണം പുരോഗമിക്കുന്നത്.