ജില്ലകൾ മാറി ആഡംബര ജീവിതം… നൂറിലേറെ മോഷണക്കേസുകൾ… ഒടുവിൽ പോലീസ് പിടിയിൽ




മലപ്പുറം: വിവിധ ജില്ലകളിലായി നൂറിലേറെ മോഷണക്കേസുകളിൽ പ്രതിയായ യുവാവ് മഞ്ചേരി പൊലീസിന്റെ പിടിയിലായി. തേഞ്ഞിപ്പലം സ്വദേശി കിഴക്കേക്കോട്ടായി പാലക്കാട്ടു വീട്ടിൽ സൈനുദ്ദീൻ (43) ആണ് അറസ്റ്റിലായത്. ആളില്ലാത്ത വീടുകൾ മാത്രം കണ്ടെത്തി മോഷണം നടത്തുന്നതായിരുന്നു ഇയാളുടെ രീതി. മഞ്ചേരി നഗരത്തിൽ വീട് വാടകയ്‌ക്കെടുത്ത് താമസിച്ചായിരുന്നു പ്രതി മോഷണം നടത്തിയിരുന്നത്.

ഒരു പ്രദേശത്ത് മോഷണം നടത്തിയാൽ ഉടൻ മറ്റൊരു ജില്ലയിലേക്ക് കടക്കും. അവിടെ താമസിച്ച് മോഷണത്തിലൂടെ ലഭിക്കുന്ന പണം ഉപയോഗിച്ച് ആഡംബര ജീവിതം നയിക്കുകയായിരുന്നു പതിവ്. പൊലീസ് അന്വേഷണം ശക്തമാകുന്നതോടെ താമസസ്ഥലവും മാറ്റും. മഞ്ചേരിയിലെ കരുവമ്പ്രം, നറുകര മേഖലകളിൽ അടുത്തിടെ വ്യാപകമായി മോഷണം നടന്നിരുന്നു. ഈ സംഭവങ്ങളെക്കുറിച്ചുള്ള അന്വേഷണത്തിനിടെയാണ് സൈനുദ്ദീനെക്കുറിച്ച് പൊലീസിന് സൂചന ലഭിച്ചത്. പ്രദേശങ്ങളിലെ സിസിടിവി ദൃശ്യങ്ങൾ പരിശോധിച്ചതും സമാന രീതിയിൽ നടന്ന മോഷണങ്ങളുടെ വിവരങ്ങൾ ശേഖരിച്ചതും അന്വേഷണത്തിൽ നിർണായകമായി. തുടർന്ന് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. ജില്ലകൾ മാറി താമസിക്കുന്നതിനാൽ ഇയാളെ കണ്ടെത്താൻ പൊലീസ് പ്രത്യേക അന്വേഷണവും നടത്തിയിരുന്നു.


ഒടുവിൽ മഞ്ചേരി പൊലീസിന്റെ നേതൃത്വത്തിൽ നടത്തിയ നീക്കത്തിലൂടെയാണ് പ്രതി പിടിയിലായത്. വിവിധ ജില്ലകളിലായി നൂറിലധികം മോഷണക്കേസുകൾ ഇയാളുടെ പേരിലുണ്ടെന്നാണ് പൊലീസ് അറിയിച്ചത്. മോഷണത്തിന് ഉപയോഗിച്ച രീതികളും മറ്റു ജില്ലകളിലെ കേസുകളുമായുള്ള ബന്ധവും പൊലീസ് പരിശോധിച്ചുവരികയാണ്. മഞ്ചേരി സ്റ്റേഷൻ ഇൻസ്‌പെക്ടർ ടി.ജി. ദിലീപിന്റെ നേതൃത്വത്തിൽ സബ് ഇൻസ്‌പെക്ടർ ശിശിര ശശികുമാറാണ് പ്രതിയെ അറസ്റ്റ് ചെയ്തത്. ഉബൈദുല്ല, സാലിം, ധനേഷ്, ബിജു, മുജീബ് എന്നിവരും സൈബർ വിഭാഗവും അന്വേഷണത്തിൽ പങ്കാളികളായി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

أحدث أقدم