റിയാദ് :സൗദി അതിര്ത്തികള് വീണ്ടും തുറന്നു. പുതിയ വൈറസ് വ്യാപനത്തെ തുടര്ന്ന് രണ്ടാഴ്ച മുമ്പാണ് സൗദി അതിര്ത്തികള് അടച്ചത്. ജനിതക മാറ്റം സംഭവിച്ച കൊവിഡ് വ്യാപനത്തെ തുടര്ന്ന് രണ്ടാഴ്ച മുമ്പ് ഏര്പ്പെടുത്തിയ യാത്രാ വിലക്ക് ഇന്ന് രാവിലെ 11 മണി മുതല് പൂര്ണമായും പിന്വലിച്ചതായി സൗദി ആഭ്യന്തര മന്ത്രാലയം അറിയിച്ചു.
വ്യോമ, കടല്, കര മാര്ഗം വിദേശികള് ഉള്പ്പെടെയുള്ളവര്ക്ക് ഇനി സൗദിയിലേക്ക് പ്രവേശിക്കാം. സൗദിയില് നിന്ന് പുറത്തു പോകാനുള്ള വിലക്ക് ഒരാഴ്ച മുമ്പ് പിന്വലിച്ചിരുന്നുവെങ്കിലും സൗദിയിലേക്കു പ്രവേശിക്കുന്നതിനുള്ള വിലക്ക് ഇപ്പോഴാണ് പിന്വലിക്കുന്നത്.
മറ്റു രാജ്യങ്ങളില് നിന്നുള്ളവര് ഒരാഴ്ച ക്വാറന്റീനില് കഴിയണം. അല്ലെങ്കില് മൂന്ന് ദിവസം ക്വാറന്റീനില് കഴിഞ്ഞു പിസിആര് പരിശോധന നടത്തി കൊവിഡ് നെഗറ്റീവ് ആണെങ്കില് ക്വാറന്റീന് അവസാനിപ്പിക്കാം. എന്നാല് നേരത്തെ നേരിട്ടുള്ള വിമാന സര്വീസുകള്ക്ക് നിയന്ത്രണം ഉണ്ടായിരുന്ന ഇന്ത്യ ഉള്പ്പെടെയുള്ള രാജ്യങ്ങളില് നിന്നുള്ള നേരിട്ടുള്ള സര്വീസുകള് പുനരാഭിക്കുന്നതുമായി ബന്ധപ്പെട്ട വിശദാംശങ്ങള് ലഭ്യമായിട്ടില്ല.