വൈക്കം: വേമ്പനാട്ടു കായലിന്റെ ഓളപ്പരപ്പിനെ കീഴടക്കാന്‍ ഇരട്ടകള്‍. അഞ്ച്‌ വയസുകാരായ നൈവേദിയെയും നിഹാരികയും വേള്‍ഡ്‌ റെക്കോഡ്‌ ലക്ഷ്യമാക്കി നാളെ വേമ്പനാട്ടുകായലിന്‌ കുറുകെ നീന്തും.രാവിലെ 7.30ന്‌ ചേര്‍ത്തല കൂമ്പേല്‍കടവില്‍ നിന്നും വൈക്കം ബീച്ച്‌ വരെയുള്ള 9 കിലോമീറ്റര്‍ ദൂരമാണ്‌ കുട്ടികള്‍ നീന്തിക്കടക്കാനൊരുങ്ങുന്നത്‌.
കോതമംഗലം ഡോള്‍ഫിന്‍ അക്വാട്ടിക്‌ ക്ലബ്ബിലെ പരിശീലകന്‍ ബിജു തങ്കപ്പനാണ്‌ നിവേദ്യയെയും നിഹാരികയെയും പരിശീലിപ്പിച്ചത്‌.കഴിഞ്ഞ മദ്ധ്യവേനല്‍ അവധി മുതലാണ്‌ കുട്ടികള്‍ നീന്തല്‍ പഠിച്ചുതുടങ്ങിയത്‌. നീന്തല്‍ പരിശീലകനായ റിട്ട.ഫയര്‍ ഓഫീസര്‍ ടി.ഷാജികുമാറാണ്‌ നീന്തലിന്റെ ബാലപാഠങ്ങള്‍ പഠിപ്പിച്ചത്‌. വളരെ ചെറിയ കാലയളവിലെ പരിശീലനത്തിലൂടെ കൈകാലുകള്‍ ബന്ധിച്ച്‌ വരെ ബിജു തങ്കപ്പന്‍ പരിശീലനം നല്‍കിയ കുട്ടികള്‍ വേമ്പനാട്ട് കായല്‍ നീന്തിക്കടന്നിട്ടുണ്ട്‌.
ഇതിനോടകം 29 കുട്ടികളാണ്‌ ഡോള്‍ഫിന്‍ അക്വാട്ടിക്‌ ക്ല ബ്ബിന്റെയും ബിജു തങ്കപ്പന്റെയും നേതൃത്വത്തില്‍ നീന്തലില്‍ വേള്‍ഡ്‌ റെക്കോഡുകള്‍ നേടിയത്‌.
വൈക്കം എസ്‌.ബി.ഐയിലെ ഉദ്യോഗസ്‌ഥനായ കുലശേഖരമംഗലം വൈകുണ്‌ഠത്തില്‍ പി.ഹരീഷിന്റേയും അനുവിന്റേയും മക്കളാണയ നിവേദ്യയും നിഹാരികയും.
വെള്ളൂര്‍ ഭവന്‍സ്‌ ബാലമന്ദിറിലെ യു.കെ.ജി വിദ്യാര്‍ത്ഥികളാണ്‌ .
രാവിലെ 9ന്‌ വൈക്കം ബീച്ചില്‍ ചേരുന്ന സമ്മേളനത്തില്‍ സി.കെ.ആശ എം.എല്‍.എ, നഗരസഭ ചെയര്‍പേഴ്‌സണ്‍ പ്രീത രാജേഷ്‌, വൈസ്‌ ചെയര്‍മാന്‍ പി.ടി.സുഭാഷ്‌, വൈക്കം ഡി.വൈ.എസ്‌.പി ടി.ബി. വിജയന്‍, അര്‍ജുന അവാര്‍ഡ്‌ ജേതാവ്‌ ടോം ജോസഫ്‌, പിന്നണി ഗായകന്‍ ദേവാനന്ദ്‌ തുടങ്ങിയവര്‍ പങ്കെടുക്കും.