ഉദയംപേരൂരില് അപകടത്തില് പെട്ട് ചികിത്സയിലായിരുന്ന കൊല്ലം സ്വദേശി ലിനു മരണത്തിന് കീഴടങ്ങി. ബൈക്കും സ്കൂട്ടറും കൂട്ടിയിടിച്ച് ഗുരുതരാവസ്ഥയിലായ ലിനുവിന് ഡോക്ടര്മാര് വഴിയരികില് വെച്ച് ശസ്ത്രക്രിയ നടത്തിയത് വാര്ത്തയായിരുന്നു. തുടര്ന്ന് എറണാകുളത്തെ സ്വകാര്യ ആശുപത്രിയില് ചികിത്സയിലായിരുന്നു ലിനു.
കൊച്ചി തൃപ്പൂണിത്തുറയ്ക്ക് സമീപം ഞായറാഴ്ച രാത്രി 8.30നായിരുന്നു അപകടമുണ്ടായത്. ബൈക്കും സ്കൂട്ടറും കൂട്ടിയിടിച്ചായിരുന്നു യുവാവിന് പരിക്കേറ്റത്. ഡോക്ടര് ദമ്പതിമാരായ തോമസ് പീറ്റര്, ദിദിയ എന്നിവരും ഡോ. ബി മനൂപും ചേര്ന്നാണ് യുവാവിന് ശസ്ത്രക്രിയ നടത്തിയത്. സിനിമയില് കണ്ട ശസ്ത്രക്രിയാ രീതി ഇവര് വിജയകരമായി പൂര്ത്തിയാക്കുകയും പിന്നീട് യുവാവിനെ ആശുപത്രിയില് പ്രവേശിപ്പിക്കുകയുമായിരുന്നു.