1.12 കോടിയോളം വരുന്ന കേന്ദ്ര സർക്കാർ ജീവനക്കാരുടെയും പെൻഷൻകാരുടെയും വരുമാനത്തിൽ വൻ വർദ്ധനവ് വരുത്താൻ സാധ്യതയുള്ള എട്ടാം ശമ്പള കമ്മീഷന്റെ ശുപാർശകൾ ഉടൻ ഉണ്ടായേക്കും. 2016 മുതൽ നിലവിലുള്ള ഏഴാം ശമ്പള കമ്മീഷന് പകരമായാണ് പുതിയ പരിഷ്കാരം വരുന്നത്. ഇത് ഇന്ത്യൻ സമ്പദ്വ്യവസ്ഥയിൽ വലിയ ചലനങ്ങൾ സൃഷ്ടിക്കുമെന്ന് സാമ്പത്തിക വിദഗ്ധർ വിലയിരുത്തുന്നു. ഏഴാം ശമ്പള കമ്മീഷനിൽ അടിസ്ഥാന ശമ്പളത്തിൽ ഏകദേശം 14 ശതമാനം വർദ്ധനവാണ് ലഭിച്ചിരുന്നത്
എന്നാൽ ഇത്തവണ 30 ശതമാനം മുതൽ 34 ശതമാനം വരെ ശമ്പളത്തിലും പെൻഷനിലും വർദ്ധനവുണ്ടായേക്കാമെന്ന് ആംബിറ്റ് ഇൻസ്റ്റിറ്റ്യൂഷണൽ ഇക്വിറ്റീസ് റിപ്പോർട്ട് ചെയ്യുന്നു. ശമ്പള വർദ്ധനവ് നിശ്ചയിക്കുന്ന ഫിറ്റ്മെന്റ് ഫാക്ടർ 1.9 മുതൽ 3.0 വരെ ആകാൻ സാധ്യതയുണ്ടെന്നാണ് വിദഗ്ധരുടെ അഭിപ്രായം. ഇത് അടിസ്ഥാന ശമ്പളത്തിൽ വലിയ മാറ്റം വരുത്തും. കമ്മീഷൻ ശുപാർശകൾ നടപ്പിലാക്കാൻ വൈകിയാലും, 2026 ജനുവരി ഒന്ന് മുതൽ പ്രാബല്യത്തിൽ വരുന്ന രീതിയിലുള്ള കുടിശ്ശിക ജീവനക്കാർക്ക് ലഭിക്കാൻ സാധ്യതയുണ്ട്