തിരുവനന്തപുരം: ഒരാഴ്ചയിലേറെ നീണ്ടുനിന്ന ഓണാഘോഷത്തിന് തലസ്ഥാന നഗരിയിൽ വർണാഭമായ കൊടിയിറക്കം. സംസ്ഥാന ടൂറിസം വകുപ്പിന്റെ നേതൃത്വത്തിൽ നടന്ന ഓണം വാരാഘോഷത്തിന് സമാപനമായി സംഘടിപ്പിച്ച സാംസ്കാരിക ഘോഷയാത്ര ഉപരാഷ്ട്രപതി സി.പി. രാധാകൃഷ്ണൻ ഫ്ലാഗ് ഓഫ് ചെയ്തു. കേരളത്തിന്റെ സാംസ്കാരിക വൈവിധ്യവും പാരമ്പര്യവും വിളിച്ചോതിയ ഘോഷയാത്ര കാണാൻ ആയിരങ്ങളാണ് നഗരത്തിലേക്ക് ഒഴുകിയെത്തിയത്.
വിവിധ സർക്കാർ വകുപ്പുകളുടെയും സംഘടനകളുടെയും ഫ്ലോട്ടുകൾക്കും നിശ്ചലദൃശ്യങ്ങൾക്കും പുറമെ വിവിധ സംസ്ഥാനങ്ങളിൽ നിന്നുള്ള കലാരൂപങ്ങളും ഘോഷയാത്രയിൽ അണിനിരന്നു. ഔദ്യോഗിക കണക്കുകൾ പ്രകാരം 69 ഫ്ലോട്ടുകളും 99 കലാരൂപങ്ങളുമാണ് ഘോഷയാത്രയുടെ ഭാഗമായത്. ഗവർണർ രാജേന്ദ്ര വിശ്വനാഥ് ആർലേക്കർ, മുഖ്യമന്ത്രി വി.ഡി. സതീശൻ, മന്ത്രിമാരായ പി.സി. വിഷ്ണുനാഥ്, കെ. മുരളീധരൻ തുടങ്ങിയവരും ചടങ്ങിൽ പങ്കെടുത്തു. ഉപരാഷ്ട്രപതിയുടെ കേരള സന്ദർശനത്തിന്റെ ഭാഗമായാണ് തിരുവനന്തപുരത്തെ ഓണം വാരാഘോഷ സമാപന ഘോഷയാത്ര അദ്ദേഹം ഉദ്ഘാടനം ചെയ്തത്. സമാപന വേദിയിൽ വന്ദേമാതരം പൂർണമായും ആലപിച്ചു. ഉപരാഷ്ട്രപതി പങ്കെടുക്കുന്ന ഔദ്യോഗിക ചടങ്ങായതിനാൽ പ്രോട്ടോക്കോൾ പാലിക്കുമെന്ന് സർക്കാർ നേരത്തെ വ്യക്തമാക്കിയിരുന്നു
ഓണം വാരാഘോഷത്തിന്റെ ഭാഗമായി തലസ്ഥാനത്ത് 35 വേദികളിലായി 340-ലേറെ കലാപരിപാടികളാണ് അരങ്ങേറിയത്. മൂവായിരത്തോളം കലാകാരന്മാരും പരിപാടികളുടെ ഭാഗമായി. കവടിയാർ മുതൽ കിഴക്കേകോട്ട വരെയുള്ള നഗരവീഥികൾ ദീപാലങ്കാരങ്ങളാൽ നേരത്തെ തന്നെ ഉത്സവാന്തരീക്ഷത്തിലായിരുന്നു. വർണവെളിച്ചവും കലാരൂപങ്ങളും ഫ്ലോട്ടുകളും നിറഞ്ഞ ഘോഷയാത്രയോടെ തലസ്ഥാനത്തെ ഓണാഘോഷങ്ങൾക്ക് ഔദ്യോഗിക സമാപനമായി.