പരുമല : മലങ്കര സുറിയാനി ക്രിസ്ത്യാനി അസോസിയേഷന് തുടക്കമായി. അസോസിയേഷന് പ്രസിഡന്റ് കുറിയാക്കോസ് മാര്‍ ക്ലീമ്മീസ് കാതോലിക്കേറ്റ് പതാക ഉയര്‍ത്തി. പരുമല പള്ളിയിലെ പ്രാര്‍ത്ഥനയ്ക്കും, ധൂപ പ്രാര്‍ത്ഥനയ്ക്കും ശേഷമാണ് പതാക ഉയര്‍ത്തിയത്.
നാളെ ചേരുന്ന അസോസിയേഷനില്‍ സുന്നഹദോസിന്റെ ശുപാര്‍ശപ്രകാരം സഭാ മാനേജിങ് കമ്മറ്റിയുടെ ഏക നാമനിര്‍ദ്ദേശമായ കണ്ടനാട് വെസ്റ്റ് ഭദ്രാസനാധിപന്‍ ഡോ. മാത്യൂസ് മാര്‍ സേവേറിയോസ് മെത്രാപ്പോലീത്തായെ 22-ാമത് മലങ്കര മെത്രാപ്പോലിത്തായായും 9-ാമത് കാതോലിക്കായുമായി ഐകകണ്ഠ്യേന തെരഞ്ഞെടുക്കും. തുടർന്ന് മലങ്കര മെത്രാപ്പോലീത്തായുടെ സ്ഥാന ചിഹ്നങ്ങള്‍ അണിയിക്കും.
അതിനുശേഷം പരുമല തിരുമേനിയുടെ കബറിടത്തില്‍ ധൂപ പ്രാര്‍ത്ഥന നടത്തും. തുടര്‍ന്ന് സുന്നഹദോസ് ചേര്‍ന്ന് അസോസിയേഷന് യോഗ തീരുമാനം അംഗീകരിക്കുകയും സ്ഥാനോഹരണ ദിവസവും സ്ഥലവും സമയവും ഔദ്യോഗികമായി പ്രഖ്യാപിക്കും.
സ്ഥാനാരോഹണം 15 നാകും നടക്കുക.
നാളെ നടക്കുന്ന മലങ്കര സുറിയാനി ക്രിസ്ത്യാനി അസോസിയേഷനില്‍ ഇരു സ്ഥാനങ്ങളുടെയും പിന്‍ഗാമിയായി ഡോ. മാത്യൂസ് മാര്‍ സേവേറിയോസിനെ തെരഞ്ഞെടുക്കുന്നതോടെ അദ്ദേഹം പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ എന്ന നാമധേയം സ്വീകരിക്കും. 1934 ഡിസംബര്‍ 26-ന് ശേഷം മലങ്കര മെത്രാപ്പോലീത്താ പദവിയില്‍ എത്തുന്ന ആദ്യ വ്യക്തി എന്ന സ്ഥാനവും മെത്രാപ്പോലീത്തായില്‍ വന്നുചേരും.
15ന് രാവിലെ 6ന് പ്രഭാത നമസ്‌ക്കാരത്തോടെ സ്ഥാനാരോഹണ ചടങ്ങ് ആരംഭിക്കും. സീനിയര്‍ മെത്രാപ്പോലീത്തായും അഡ്മിനിസ്‌ട്രേറ്റീവ് കൗണ്‍സില്‍ പ്രസിഡന്‍റുമായ കുറിയാക്കോസ് മാര്‍ ക്ലീമീസ് മെത്രാപ്പൊലീത്തായുടെ പ്രധാന കാർമികത്വത്തിലും സീനിയര്‍മാരായ രണ്ട് മെത്രാപ്പോലീത്തമാരുടെയുടെ കാർമികത്വത്തിലും സഭയിലെ മറ്റ് മെത്രാപ്പൊലീത്താമാരുടെ സഹകാർമികത്വത്തിലുമാണ് കാതോലിക്കാ സ്ഥാനാരോഹണ ചടങ്ങ് നടക്കുക.
കൊവിഡ് മഹാമാരിയുടെ പശ്ചാത്തലത്തിൽ സഭയുടെ ഏറ്റവും വലിയ ജനാധിപത്യ സമിതി ഇന്ന് വീഡിയോ കോൺഫറൻസിലൂടെയാണ് സമ്മേളിക്കുന്നത്. 30 ഭദ്രാസനങ്ങളിലെ 1,590 ഇടവകകളിൽ നിന്നുള്ള 4,007 പേരാണ് അസോസിയേഷനിൽ പങ്കെടുക്കുക.