റിയാദ്: ഗാര്ഹിക, വാണിജ്യ ആവശ്യത്തിനുള്ള പാചകവാതക സിലിണ്ടറുകള് വിതരണം ചെയ്യുന്നതിന് സൗദിയില് വെന്ഡിങ് മെഷീനുകള് വരുന്നു. എടിഎം കൗണ്ടറില് നിന്ന് പണമെടുക്കുന്നതു പോലെ സെല്ഫ് സര്വീസിലൂടെ 24 മണിക്കൂറും സിലിണ്ടര് ലഭിക്കുന്ന സംവിധാനമാണിത്. വെന്ഡിങ് മെഷീനുകള് വഴി എല്പിജി സിലിണ്ടര് നല്കുന്നതിന് രാജ്യത്ത് ആദ്യത്തെ ലൈസന്സ് നല്കിയതായി സൗദി ഊര്ജ മന്ത്രാലയം അറിയിച്ചു.
രാജ്യത്തുടനീളം ഇത്തരം ഗ്യാസ് വെന്ഡിങ് മെഷീനുകള് സ്ഥാപിക്കും. ഇതിനായി ഇത്തരം സേവനം നല്കാന് ആഗ്രഹിക്കുന്നവരില് നിന്ന് മന്ത്രാലയം അപേക്ഷ ക്ഷണിച്ചു. ഷോപ്പിങ് മാളുകളിലും സൂപ്പര് മാര്ക്കറ്റുകളിലുമെല്ലാം വെന്ഡിങ് മെഷീനുകള് സ്ഥാപിക്കാം. ഇതിലൂടെ കൂടുതല് മെച്ചപ്പെട്ട സേവനങ്ങള് എളുപ്പത്തില് സുരക്ഷിതമായി നേടാനാകുമെന്നും മന്ത്രാലയം അറിയിച്ചു.
മൊബൈല് ഫോണിലെ ആപ്ലിക്കേഷനുമായി ബന്ധിപ്പിച്ചാണ് വെന്ഡിങ് മെഷീനുകളുടെ പ്രവര്ത്തനമെന്നതിനാല് പണമടയ്ക്കുന്നതും സിലിണ്ടര് സ്വീകരിക്കുന്നതും കൂടുതല് എളുപ്പമാവും. ആദ്യമായി ഗ്യാസ് സിലിണ്ടറുകള് വാങ്ങുക, ഒഴിഞ്ഞ സിലിണ്ടറുകള്ക്ക് പകരം പുതിയവ സ്വീകരിക്കുക, റെഗുലേറ്ററുകളും മറ്റും പോലുള്ള സിലിണ്ടര് ആക്സസറികള് വാങ്ങുക എന്നിവ ഇതില് ഉള്പ്പെടുന്നു.
ഗ്യാസ് സിലിണ്ടറുകള് നല്കുന്ന ലൈസന്സുള്ള സ്മാര്ട്ട് പിക്ക്അപ്പ് സ്റ്റേഷനുകള് വരുന്നതോടെ എല്പിജി വില്പ്പന മേഖലയില് ആരോഗ്യകരമായ മല്സരമുണ്ടാവുകയും സേവനം മെച്ചപ്പെടുകയും ചെയ്യും. ഈ രംഗത്തെ കുത്തക ഇല്ലാതാവുകയും ചെയ്യും. എല്പിജി വില്പ്പന പ്രവര്ത്തനങ്ങളില് നിക്ഷേപം പ്രോത്സാഹിപ്പിക്കാനും മന്ത്രാലയം ലക്ഷ്യമിടുന്നു.
എല്പിജിയുടെ മൊത്ത വിതരണത്തിന് പുറമേ ഫില്ലിങ്, സ്റ്റോറേജ് സൗകര്യങ്ങള് ഒരുക്കാന് ആഗ്രഹിക്കുന്ന കമ്പനികളില് നിന്നും മന്ത്രാലയത്തിന് അപേക്ഷകള് ലഭിച്ചു തുടങ്ങിയിട്ടുണ്ട്. സൗദി വിഷന് 2030 ന്റെ ലക്ഷ്യങ്ങള്ക്ക് അനുസൃതമായി രാജ്യത്തിന്റെ വളര്ച്ചയ്ക്കും സാമ്പത്തിക വികസനത്തിനുമുള്ള അവസരങ്ങളെ പിന്തുണയ്ക്കുന്നതിനും ഊര്ജ മന്ത്രാലയവും ശ്രമങ്ങള് നടത്തിവരികയാണ്.
പാചകവാതകം ലഭിക്കാന് പ്രത്യേക അപേക്ഷയോ സമര്പ്പിക്കുകയോ കണക്ഷന് നേടുകയോ ചെയ്യേണ്ടതില്ല. സ്വദേശികള്ക്കും വിദേശികള്ക്കും മൊബൈല് ആപ്ലിക്കേഷന് ഡൗണ്ലോഡ് ചെയ്ത് രജിസ്റ്റര് ചെയ്താല് വെന്ഡിങ് മെഷീനുകള് വഴി ആരുടെയും സഹായമില്ലാതെ സിലിണ്ടറുകള് ലഭിക്കും.
സേവനരീതികള് ആധുനികവത്കരിക്കുക, ഗ്യാസ് ലഭ്യതയും വിതരണത്തിന്റെ സുരക്ഷയും ഉറപ്പുവരുത്തുക, ഗ്യാസ് വിതരണം ചെയ്യാന് ലൈസന്സുള്ള സ്റ്റേഷനുകളുടെ എണ്ണം വര്ധിപ്പിക്കുക, സാങ്കേതികവിദ്യ സ്വദേശിവല്ക്കരിക്കുക, ഉപഭോക്താക്കളുടെ താല്പര്യങ്ങള് സംരക്ഷിക്കുക, സിലിണ്ടറുകളും റെഗുലേറ്റര് പോലുള്ള അനുബന്ധ സാധങ്ങളും വില്ക്കാനുള്ള ഔട്ട്ലെറ്റുകള് വൈവിധ്യവത്കരിക്കുക എന്നിവയും ഇതിലൂടെ മന്ത്രാലയം ലക്ഷ്യമിടുന്നു.